         |
|
Nan eenjit srìdatr’igwijìinlik 1992 tå’ee jii Gwich’in Kat Geenjit Nagwijìlzhiinat srìit’inyàanch’uu kat nihkhàh hadàach’yaa nihåi’ejùk dagwidich’uu gwizhìt guk’àndeh tr’inahtii t’atr’agwähjik. Leii kat t’at yeenoo nekhwek’yùu ts’àt nekhweginjìk hàh tr’igwìidìnjii geenjit ganìinji’tr’adhat gwik’ìighe’ Gwich’in Social & Cultural Institute (GSCI) gwilàii gwiindhat ànts’àt yeenoo nits’òo nakhwàh gwich’in kat gogwiindai’ nits’òo t’àgeedi’in’ tthak gwitr’it gogwahahtsaa geenjit nihkhàh nàgìniinjiå. Khâîîts’an dài’ 1993, at’at gwitr’it gatr’igwìnii’aih, ‘jidìi tthak geenjit gogwidintå’òh, nekhwek’yùu k’atr’inahtii geenjit, ts’àt nekhwek’yùu tth’aih gwik’ìt akòo tr’idi’ii ts’àt nekhweginjìk, nits’òo tr’igwiindai’, ts’àt jidìi vàh gòodlii geenjit tr’agwahtsii’ chan guuk’oh tr’igwiheelyaa. Gwich’in Kat Geenjit Nagwijìlzhiinat gwizhìt GSCI t’at nekhwek’yùu eenjit k’àtr’ìnahtii giinlih. Jii kat chan tsèedhòh gidaatsih kwaa ts’àt inihåik gwà’àn goots’at tsèedhòh gôôtå’àtr’âhtshùh, dinjii its’iteech’ì’ neekaii ànyàanch’uu jii kaiik’ìt daang gwats’at guk’àgogwaadhat zhàn giinlii ts’àt GTC gwats’at ihåee goovàh dhidii. Jidìi hàh gwitr’it t’agwah’ii t’at jidìi gwiyeendoo nekhwek’yùu geenjit gihk’àgahaandal, nekhweginjik, ts’àt nànkak geenjit jidìi gàhgidandaii gàh gwitr’it t’agogwah’in jii tthak diiyeenjit gwiheezaa geenjit akòo t’àgidi’in. Jùhts’ants’àt chan jidìi nekhwek’yùu geenjit gàhgiheedandaii ts’àt yiinji’gogwichil’ee geenjit diinjitr’idizhit. Jii nan srìdatr’igwijìinlik dài’ kaiik’it daang ànyàanch’uu gwizhìt Aklavik, Teetå’it Zheh, Tsiigèhtshik ts’àt Inuvik kat hàh tthak GSCI goovàh gwitr’it t’agwah’ii. Gehkhee ts’àt chan Yukon gwà’àn yeenoo dài’ ezhik gwà’àn nakhwàh gwich’in kat gogwiindai’ nijìn nan srìdatr’igwijìinlik gwi’dìnehtå’èe’ gwizhìt gwidinùutå’oo, jidìi tr’oochìt ts’àt tr’oochìt nigêhdoo t’atr’ijâhch’uu giiyàhnuu, ezhik danh geetàk gwitr’it tr’agwahtsii. GSCI t’at Tsiigèhtshik gwizhìt iisrits’àt gogwitr’it dehk’ìt gòo’àii, geenjit gihk’aanjii ihåee t’at yi’eenjì’ Sriitsookaiik’ìt gwizhìt vigwitr’it dehk’ìt gòo’àii, ts’àt Teetå’it Zheh gwizhìt chan nekhweginjìk eenjit gwitr’it dehk’ìt gòo’aih. Inuvik gwizhìt danh chan Mackenzie Gas Project eenjit yeenoo dài’ jidìi ahgwidandaii åee digigwitr’it dehk’it k’eejit ezhik danh gatr’igwinii’aih.
|
|
