Ginjih

Diiginjìk Dàgòonch’uu Geenjit Zhàn Nilii

Nagwidàdhat gwiinlit gwànoo, ch’ànuh gòodlit ts’àt nan tat nagahdadaå kat tr’oochìt nakhwanankak gwà’àn k’agadadaå dài’ nakhwàh gwìch’in kat guudigichùujil Uunjit k’yùu ts’àt French k’yùu gwizraih gigîîkhii. Dinjii zhuh kat jii Uunjit kat nakhwanànkak gwà’àn nits’òo adagwahdaandaii geenjit goots’àt tr’igiinjik, ts’àt aii gwijihkheh jii Dinjii zhuh kat adài’ gwànoo jii dinjii dazhan ihåee akòo didiinu’ neenjik hee nits’òo yeenoo tr’igwiindai’ ts’àt nekhweginjik hàh tr’igweedindak.

Nagwidàdhat ihåok jùutin jùutin ànts’àt diinilì’ jùutin, nakhwàh gwìch’in kat gootr’aanu’ nekhwegii kat gè’tr’oonahtan gwits’àt gihijaa kwah jì’ yeendòo Uunjit ts’aii tr’agwandaii duuyeh gwiinzii gogàhnuu. Gwiintå’òh gè’tr’oonahtan gwik’ìighe’ nakhweenjit gwiintå’òh ejùk t’agòonch’uu, nakhwezhehk’oo nits’òo t’agwiinch’u’ aii chan gwiintå’oh gwik’ìt t’agwidich’uh kwaa. K’eejit kat gè’tr’oonahtan gwits’àt gichùujil diginànkak gwizhìt aachin giinlii k’ìt goovàh t’agòonch’uu, dagakaiik’ìt neegiheedidaa ts’àt digiyùughwàn ts’àt anjòo kat hàh guuveenjit gwiintå’òh ejùk t’agòonch’uh.

Goolàt kat akòo t’àgìnuu, k’eejit tr’iinlii diiginjik tr’igiheekhyah guk’agugwandaii gwiintsàå gògwiintri’. Guuzhik goolàt kat chan diiginjik tr’igîîkhii dài’ åoo gootthai’ tat gwiizii gòonlih kwaa chan ginuh aii geenjit diiginjik zhìt tr’igîîkhih kwaa.

Diilàt kat chan juudìn tth’aih dinjii zhuh k’yùu tr’igîîkhii ekhe’ tr’oohadeenjaa kwaa gwiiniindhan. Gwiyeendoo diiginjìk zhìt gihìidìkhyah gwiinzii ts’aii akòo t’ahìidì’yaa guk’àgwìidandaih. Jii t’at juudìn gwiintå’òh ganìinji’adhat kat hàh aii gwizhìt geenjit ts’àt natr’igîîkhii ts’àt nekhwek’yùu yiinjigwichitàa’ee gwizraih gwiiniindhan.

Akòo t’àgìnuu chan nekhweginjìk zhìt nagihìidìjaa guk’agwìidandaii geenjit natr’âhdaii yeendòo niizhìt gwihèedhàa gòo nihkhàh gwitr’it t’agwàa’ii jì’ at’at nekhweginjìk zhìt duulèh natr’igiheejaa gwahahtsaa gadiinjiidìzhit. Jii t’at diiyàh gwitr’it t’agoh’ii jì’ gwiheezah!

Diiginjik zhìt ginohkhih jì’ chan guk’àgôhdaii ts’àt nekhwedivee gwiheezàa. Hâî’ choo ts’àt k’ègwaadhat nakhwàh vilì’, shilàk kat!

Willyam Jorge Firth viginjìk t’iinch’uh
(Gwich’in Eenjit Gwitr’it ts’àt Gwidehk’ìt gwichìt nilii)
Vàdzaih Zrìi’ 2003