Geenjit Gihk’àtr’aanjih

Gwakaiik’ìt Goozrì’ Nan K’ìt Dinithatå’oo

Kaiik’it goozrì’ tee jùutin ànyàanch’uu gòonlii gwinoh’ii gwichih han tagwâhjii.

Mackenzie River, Peel River, or Arctic Red River

Gwizhìt khaihtak gohtsii guuzhìk nàh sruudohch’uh jì’ gadiinjiidìzhit!

Nagwidàdhat 1992 dài’ gwats’at, jii Gwich’in Social and Cultural Institute kat chan anjòo kat hàh gwitr’it t’agogwah’in’ nijìn gwà’àn nan k’àtr’ahnahtyaa jidìi yeenoo dài’ gogwandàk giiyàh gwaandak k’ìighe’ ts’àt yeendoo nakhwizhuunadijii kat guuveenjit akòo t’ageedi’in’ zhik nakhwanankak gwizhìt danh. Aii k’ìighe’ yeenoo dài’ nits’òots’àt nakhwanànkak t’atr’ijâhch’uu geenjit giiyàh gogwaandak, ts’àt nan t’eh ejìich’ii agogwahah’yaa gwizhìt chan, yeenoo gogwandàk tr’oonjik, nihåi’idanh gwà’àn nan goozrì’ ts’àt geenjit gwandak gidi’inh jì’, taii yeenoo gwit’àtr’ìjâhch’u’, nijìn gwà’àn yeenoo tr’igweech’in’, tth’an k’ìt, jidìi ganagwahaandaii ts’àt jidìi vakak t’àgwijùudhat àhgwidandaii, åuk gòo atthài’ eenjit nizii gwidehk’ìt, gòo nijìn gwà’àn diichih jidìi tàgwìjùudhat geenjit diiyàh gogwaandak, aii tthak geenjit gatr’idinuutå’oh.

Jùk gwits’àt chan, GSCI t’at zhik nan srìdatr’igwijìinlik gwizhìt 1,000 ànyàanch’uu nihk’yùu kaiik’ìt gwà’àn goozrì’ tagogwìånjik. Gehkhee ts’àt chan nan k’ìt dinithàtå’oo kak nijìn gwà’àn kaiik’ìt gwiinli’ aii gwizhìt geenjit chan “jii jidìi kak gogwaandak” tee jùutin kaiik’ìt t’ìnyàanch’uu gwizhìt geenjit gwitr’it gogwàåtsaih. Jii han iisrits’àt gwinjik nakhwanankak gwizhìt, aii kat t’at yeenoo gwinii’ee t’atr’ijâhch’uu gwìndòo dinjii zhuh kat geenjit yeenoo t’agwiinch’u’ ts’àt nits’òo tr’igwiindai’ gihk’àhôhdàl.